index introductio imagines || partitura exemplar translatio

bibliographia e-mail

CTH 471

Exemplar --

Citatio: R. Strauß (ed.), hethiter.net/: CTH 471 (Expl. --, 03.11.2010)

§ 1

1 -- UMMA mAmmiḫatna LÚSANGA ŠA DIšḫara LÚ URUKizzuwatna

§ 2

2 -- mān antuwaḫḫaš šuppiš

3 -- nu=šši NINDA-an maršan kuiški adanna pāi

4 -- našma=šši UZUÌ maršan adanna pāi

5 -- našma=šši NINDA-an UZUÌ alwanzaḫḫan kuiški adanna pāi

§ 3

6 -- našma=šši ŠA É.NA4 NINDA-an UZUÌ kuiški adanna pāi

7 -- našma=šši ŠA MUNUS tuēkki=šši ēšḫar akuwanna pāi

8 -- nu kī SÍSKUR šipandaḫḫi

§ 4

9 -- nu kī daḫḫi

10 -- 16 SILA4 15 MÀŠ.TUR 1 MEḪI.A MUŠEN.GAL 1 ME 8 MUŠEN.TUR

11 -- 54 DUGKUKKUB KAŠ.GEŠTIN 14 DUGḫakkunaēš Ì.DÙG.GA 2 wakšur Ì GIŠSERDUM pittalwan

12 -- 2 wakšur LÀL 3 UPNU GIŠPÈŠ 3 UPNU GIŠGEŠTIN ḪÁD.DU.A

13 -- 1 GA.KIN.AG 1 EMṢU MUN ḫazzīlaš

§ 5

14 -- UZUSA gangātiSAR lakkarwanSAR ḫuērniš 1 DUGGAL GA.KU7

§ 6

15 -- 14 SÍGkišriš BABBAR 14 SÍGtarpālaš ZA.GÌN 14 SÍGtarpālaš SA5 14 GADAkazzarnul 15 GÍN.GÍN KÙ.BABBAR

§ 7

16 -- 14 DUG MÊ šiḫillaš witēni

17 -- 14 DUG MÊ 14 DUGGÌR.GÁN 14 DUGBUR.ZI TUR 14 DUGÚTUL

18 -- 14 DUGDÍLIM.GAL SIG 40 DUGGAL 5 ME DUGḫupuwāi

§ 8

19 -- 14 GIŠlaḫḫuraš 14 TĀPAL GIŠKANNUM AD.KID 5 GIŠBANŠUR AD.KID

20 -- 14 GIŠUD.MUNUS.ḪÚB 14 GIŠŠU.GU7.NAG 14 GIŠkuškušulli

§ 9

21 -- 5 ME NINDA.SIGḪI.A 32 NINDAmulātiš ŠA ½ UPNI

22 -- 8 NINDAmulātiš tarnaš pittalwaš MUN UL išḫuwān

23 -- 1 UPNU memal pittalwan MUN! UL išḫuwān

24 -- 14 DUGDÍLIM.GAL SIG TU7 BA.BA.ZA šuwanza 14 NINDA ḫarašpāwanteš

§ 10

25 -- 1 GIŠŠÚ.A 1 GIŠGÌR.GUB 1 KUŠšarpaš

26 -- 1-NŪTIM TÚGNÍG.LÁMMEŠ 1 TÚGTÚG.GÚ.È.A HURRI 1-NŪTIM TÚG.GÚ.È.A

27 -- 1 TÚGŠÀ.GA.DÙ 1-NŪTIM TÚGE.ÍB TAḪAPŠI 1 TÚGSAG.DUL

28 -- 1-NŪTIM TÚGGADA.DAM 1-NŪTIM KUŠE.SIR

29 -- n=at ANA DU tiyanzi

§ 11

30 -- mān EN.SÍSKUR=ma MUNUS-za nu=šši GIŠḫaššalli ŠA MUNUS=ia TÚGNÍG.LÁMMEŠ

31 -- n=at ANA DḪepat tiyanzi

§ 12

32 -- NA4ZA.GÌN tepu NA4GUG tepu NA4AŠ.NU11.GAL tepu

33 -- ḫuštiš=a tepu 14 kappiš ŠE parā šiyannaš GIŠŠINIG tepu GIŠERIN tepu

§ 13

34 -- nu maḫḫan LÚAZU kī ḫuman pēdi=šši ḫandāizzi

§ 14

35 -- nu=za kuitman DUTU-uš AŠAR=ŠU nāwi ēpzi

36 -- nu=za LÚAZU 2 DUG A 2 SÍGkišrin 2 SÍGtarpālaš SA5 2 SÍGtarpālaš ZA.GÌN 2 GÍN KÙ.BABBAR 2 DUGḫakkunaēš Ì.DÙG.GA 2 GADAkazzarnulli 2 NINDA.SIG 2 DUGKUKKUB GEŠTIN dāi

§ 15

37 -- nu kī LÚAZU šarā karapzi

38 -- n=aš=kan ÍD-i parā paizzi

39 -- nu 2 NINDA.SIG paršiya

40 -- n=at=kan ÍD-i anda peššiyazzi

41 -- nu 2 DUGKUKKUB GEŠTIN dāi

42 -- nu=kan IŠTU 2 DUGKUKKUB GEŠTIN anda šipanti

43 -- namma Ì.DÙG.GA 2 DUGḫakkunauš dāi

44 -- n=ašta ÍD-i anda tepu zappanuzzi

§ 16

45 -- [n=ašt]a? taknāš DUTU-i widār wewakki

§ 17

46 -- [nu LÚAZU] 2 DUG MÊ dāi

47 -- n=ašta wātar 7-ŠU anda [šunna]i

48 -- parā=ia=kan ÍD-i anda 7-ŠU lāḫui

49 -- [ … ]-ni=ma=aš=kan šunnai

§ 18

50 -- [nu LÚAZU 2-ŠU] 7 NA4paššilan ÍD-az šarā dāi

51 -- [nu=kan ANA 1 DU]G A 7 NA4paššilan anda peššiyazzi

1 -- [namma=ia=kan AN]A 1 DUG A 7 NA4paššilan anda [peššiyazzi]

53 -- [GIŠŠIN]IG=ia=kan ANA 1 DUG MÊ [ … an-da pe]ššiyazzi

54 -- nu GIŠŠINIG [ … ] 2 DUG A šer šutāizzi

§ 19

55 -- [ … GADA-it a]nda kariyazzi

56 -- n=at=šan šuḫḫi šarā pēdai

57 -- nu 2 TAPAL GIŠKANNUM AD.KID dāi

58 -- n=ašta 2 DUG A šer ANA GIŠKANNUM AD.KID dāi

§ 20

59 -- nu ANA 2 DUG A peran katta 1 ḫubrušḫin ŠA GIŠ iēzzi

60 -- EGIR ḫubrušḫi=ma 1 GIŠBANŠUR AD.KID dāi

§ 21

61 -- nu=ššan ANA 1 GIŠBANŠUR AD.KID 2 NINDAmulātiš 10 NINDA.SIGḪI.A

62 -- 2 BUR.ZI TUR Ì GIŠSERDUM pittalwan GIŠERIN 4 DUGGAL GEŠTIN dāi

§ 22

63 -- nu ḫubrušḫin warnuwanzi

64 -- nu=za LÚAZU 1 MUŠEN.GAL dāi

65 -- n=an=kan ANA DEN.ZU witēni DŠārimmati šipanti

§ 23

66 -- nu=za namma 1 MUŠEN.GAL dāi

67 -- n=an=kan ŠA DUTU witēni Šāluš Pītinḫi šipanti

§ 24

68 -- nu ⌈4⌉? NINDAmulātin pittalwan MUN-an kuedani UL išḫuwān memal=a pittalwan dāi

§ 25

69 -- nu LÚAZU 1 NINDAmulātin witēni awan katta paršiya

70 -- n=an tagān dāi

71 -- memal=a šaramnaz arḫa išḫuwāi

72 -- šaramnaz=ma=kan ANA NINDAmulāti šer šuḫḫāi

§ 26

73 -- n=ašta LÚAZU anda ḫurlili kiššan memai

74 -- DIm(-)?butte šīlal=o=(ḫ)ḫi šāla Tupkiyā=ve

74 -- DImputi? šilaluḫi šala Tupkiyawe

75 -- annū=n mirzi annū=n=mān irāne annū=n kakkari annū=l=ān tuluzzi=na

75 -- anun mirzi anunman irani anun kakari anulan tuluzina

76 -- nē=ol=o=kka=man un=ol=o=kka=man

76 -- neulukaman unulukaman

77 -- šeġel=ni=ve=NA=aš=va pud=o=ž šīe=na=aš=va

77 -- šiḫilniwinašwa puduš šinašwa

§ 27

78 -- nu widār ANA ŠAPAL MULḪI.A šešzi

§ 28

79 -- mān lukkatta DUTU-uš=kan upzi

80 -- nu LÚAZU SÍSKUR ḫuman šarā dāi

81 -- n=at dammili pēdi pēdāi

§ 29

82 -- nu LÚAZU dammili pēdi 2-ŠU 7 ḫubrušḫin ḫandāizzi

83 -- EGIR ḫubrušḫi=ma 2-ŠU 7 GIŠlaḫḫuran dāi

§ 30

84 -- n=ašta ANA 1 GIŠlaḫḫura katta kiššan ḫandāizzi

85 -- 32 DUGḫupuwāi nu 16 DUGḫupuwāi IŠTU KAŠ.GEŠTIN šuwan

86 -- 16 DUGḫupuwāi=ma IŠTU LÀL Ì GIŠSERDUM GIŠPÈŠ GIŠGEŠTIN ḪÁD.DU.A GIŠSERDUM šuwan

§ 31

87 -- nu 24 SILA4 dāi

88 -- n=ašta ANA 1 NINDA.SIG MUN UZUSA šer dāi

89 -- ANA 1 NINDA.SIG=ma=ššan šer gangāti dāi

90 -- ANA 1 NINDA.SIG=ma=ššan šer GIŠINBIḪI.A šuḫḫai

91 -- n=ašta Ì GIŠSERDUM ANA DUG šimallu šer lāḫui

§ 32

92 -- nu 7 MUŠEN.TUR 1 MÁŠ.TUR ANA kupti dāi

93 -- 7 MUŠEN.TUR 1 ⌈SILA4⌉ ANA irmušī dāi

§ 33

94 -- n=ašta kī maḫḫan ANA 1 GIŠlaḫḫura kattan ḫandān

95 -- ANA 2-ŠU 7 GIŠlaḫḫura=ia=kan katta QĀTAMMA ḫandāizzi

§ 34

96 -- nu GIŠŠÚ.A ḫantezzi PĀNI ḫubrušḫi dāi

97 -- ŠAPAL GIŠŠÚ.A=ma GIŠGÌR.GUB dāi

98 -- nu=ššan ANA GIŠŠÚ.A TÚGNÍG.LÁMMEŠ šer dāi

99 -- ANA GIŠGÌR.GUB=ma=ššan šer KUŠE.SIR TÚGGADA.DAM dāi

§ 35

100 -- nu LÚAZU 1 MUŠEN.TUR dāi

101 -- n=an=kan ANA GIŠŠÚ.A ḫubrušḫi GIŠlaḫḫuri EN.SÍSKUR=ia šer arḫa waḫnuzzi

§ 36

102 -- nu EN.SÍSKUR ḫantezzi ḫubrušḫi EGIR-an artari

§ 37

103 -- nu ḫantezzin ḫubrušḫin DIM-ni kupti šipanti

§ 38

104 -- 2-an=a KI.MIN ŠA DIM [Š]EŠ-ni šuppi šipanti

§ 39

105 -- 3-an=a ḫubrušḫin ANA DKumarb[i šipanti]

§ 40

106 -- 4-in KI.MIN ANA DÉA šipanti

§ 41

107 -- 5-n=a KI.MIN ANA DEN.ZU šipa[nti]

§ 42

108 -- 6-n=a KI.MIN ANA D[UT]U šipanti

§ 43

109 -- 7-n=a KI.MIN attaš DINGIRMEŠ-aš DAštāb[i X] DNupatik DPīšaišapḫi Dx[ … ] nepiši tagnī ḫumandaš=a DINGIRMEŠ-aš [X] U ANA DINGIR.LÚMEŠ šipanti

§ 44

110 -- 8-n=a KI.MIN ANA DḪepat šipanti

§ 45

111 -- 9-n=a KI.MIN ANA DIšḫāra šipanti

§ 46

112 -- 10-n=a KI.MIN ANA DAllāni šipanti

§ 47

113 -- 11=ma KI.MIN ANA DNikkalu šipanti

§ 48

114 -- 12=ma KI.MIN ANA DIŠTAR šipanti

§ 49

115 -- 13=ma KI.MIN ANA DGulšaš DMAḪ šipanti

§ 50

116 -- 14=ma ḫubrušḫin ANA DNābarbi DŠuwala DAiyūn Ekaldu DŠāluš Pitinḫi DAdamma DKubaba DḪašuntarḫi DINGIRMEŠ-na ḫēyaru=na ašt=o=ḫḫi=na šipanti

§ 51

117 -- nu 2 GI dāi

118 -- nu ŠA DU GIŠŠÚ.A kuēz artari

119 -- nu GIḪI.A ANA GIŠŠÚ.A ḫantezziyaz peran KÁ.GAL iēzzi

120 -- n=ašta SÍG āndaran šer arḫa ḫuittiyai

§ 52

121 -- nu 2 MUŠEN dāi

122 -- n=ašta 1-EN MUŠEN-in ZAG-az anda ḫamanki

123 -- 1 MUŠEN=ma=kan GÙB-laz anda ḫamanki

§ 53

124 -- EGIR KÁ.GAL=ma 2 ḫubrušḫin ŠA GIŠ iēzzi

125 -- nu 1-EN EGIR KÁ.GAL ZAG-az dāi

126 -- 1-EN=ma EGIR KÁ.GAL GÙB-laz dāi

§ 54

127 -- nu ZAG-aš kuiš ḫubrušḫiš n=an=kan ŠA DUTU iniyannāḫi šipanti

§ 55

128 -- GÙB-laz=ma kuiš ḫubrušḫiš n=an=kan ŠA DIŠTAR nišḫinzi šuntinnānzi šipanti

129 -- n=ašta MÁŠ.TUR nakkuššaḫiti ANA DINGIRMEŠ DINGIR.LÚMEŠ DINGIRMEŠ MUNUSMEŠ tarnai

§ 56

130 -- mān=za kī=ma SÍSKUR BĒLUM GAL kuiški šipanti nu=šši mān ZI=ŠU

131 -- n=ašta nakkuššaḫiti parā UN-an tarnai

132 -- mān=ši ZI=ŠU=ma

133 -- n=ašta parā GUD-un tarnai

§ 57

134 -- nu LÚAZU parā šalikzi

135 -- nu EN.SÍSKUR ŠU-an ēpzi

136 -- n=an=šan ŠA DU GIŠŠÚ.A ašaši

137 -- n=an LÚAZU ḫurlili udnalliškizzi

§ 58

138 -- n=an šarā titanuzi

139 -- n=an=kan KÁ.GAL-az parā uwatezzi

§ 59

140 -- nu PĀNI KÁ.GALHI.A ŠA ḪUR.SAG GIŠ-ru 2 GIŠkulāšēš kēz 1-iš kēz=ia 1-iš arandari

§ 60

141 -- nu PĀNI KÁ.GAL ZAG-az šiḫilliyaš widār IŠTU GAL artari

142 -- nu=kan GIŠŠINIG anda kitari

143 -- GÙB-laz=ma 1 DUGGAL GA KU7 artari

144 -- n=ašta GIŠSERDUM anda kitari

§ 61

145 -- nu 1 LÚAZU ḫantezziyaz ANA KÁ.GAL ZAG-za artari

146 -- DUGGAL šiḫilliyaš=a witenit ḫarzi

147 -- 1 LÚAZU=ma ANA KÁ.GAL GÙB-laz artari

148 -- DUGGAL GA.KU7=ia ḫarzi

§ 62

149 -- n=ašta maḫḫan EN.SÍSKUR IŠTU KÁ.GAL GIḪI.A parā uizzi

150 -- LÚ.MEŠAZU=ma=šši=kan GA.KU7 šiḫilliyaš=a widār šarā papparaškanzi

§ 63

151 -- LÚAZU=ma ḫurlili udnalliškizzi

§ 64

152 -- nu ḫarwāši pēdi GIŠ[ZA.LAM.GA]R tarnan

153 -- n=aš apiya paizzi

154 -- [n]=ašta šiḫilliyaš wātar IŠTU DUG MÊ šer arḫa lāḫui

155 -- nu DUGGAL šunnai

156 -- n=at É=ŠU pēdai

157 -- nu=za TÚGNÍG.LÁMMEŠ arḫa peššiyazzi

158 -- nu=za šiḫilliyaš witenit ārri

159 -- TÚGNÍG.LÁMMEŠ=ma=z LÚAZU dāi

§ 65

160 -- [ … peššiy]azzi6

161 -- n=aš EGIR-pa [ ...]izzi

§ 66

162 -- [ … 2] DUGḫubrušḫēš ḫandanteš

163 -- [mān] Éḫilammar ešzi n=uš=kan ḫilamni anda iēzzi7

164 -- [mān] Éḫilammar=ma NU.GÁL n=uš=kan šuḫḫi šer [iēzzi]

165 -- [n]u 1-edani ḫubrušḫi EGIR-an [GIŠBANŠUR AD.K]ID artari

166 -- 1-edani=a ḫubrušḫi [EGIR-a]n GIŠBANŠUR AD.KID artari

§ 67

167 -- [n=ašta] ANA 1 GIŠBANŠUR AD.KID katta kiššan ḫandāizzi

168 -- 5 NINDA.SIG 1 NINDAmulātiš 1 DUGBUR.ZI TUR Ì GIŠSERDUM GIŠERIN 1 DUGGAL KAŠ.GEŠTIN 1 DUGGAL MÊ

169 -- n=aš=šan ANA GIŠBANŠUR šer dāi

170 -- nu=za LÚAZU 1 MUŠEN.GAL dāi

171 -- n=an=kan ANA DU itkalziya šipanti

§ 68

172 -- nu=ššan namma ANA 1 GIŠBANŠUR AD.KID katta kiššan ḫandāi

173 -- 5 NINDA.SIG 1 NINDAmulātiš 1 DUGDÍLIM.GAL SIG BA.BA.ZA 2 NINDAḫarašpāwanteš 1 DUGBUR.ZI TUR Ì GIŠSERDUM 1 DUGGAL KAŠ.GEŠTIN 1 DUGGAL MÊ

174 -- nu=za LÚAZU 1 MUŠEN.GAL dāi

175 -- n=an=šan ANA DUTU ḫurniššiya šipanti

§ 69

176 -- nu 1 kappin ŠE dāi

177 -- NA4ZA.GÌN NA4GUG NA4AŠ.NU11.GAL tepu dāi

178 -- ḫuštin GIŠERIN GIŠŠINIG tepu dāi

179 -- n=at=šan ANA GIŠkuškušulli katta kuškušzi

180 -- arḫa=ma=at šiḫilliyaš witenit tarnai

181 -- n=ašta EN.SÍSKUR DUTU-i menaḫḫanda tiēzzi

182 -- nu kē wašši tangaranza ekuzi

§ 70

183 -- nu=za EN.SÍSKUR adanna ešari

184 -- maḫḫan=ma mištiliya meḫur tiēzzi

185 -- nu namma 2 hubrušḫēš ḫandānzi

186 -- n=ašta ḫantezzi GIŠBANŠUR AD.KID TU7 BA.BA.ZA=kan kuedani UL kitari

187 -- nu=za LÚAZU 1 MUŠEN.GAL dāi

188 -- n=an=kan ŠA DU ŠEŠ-ni itkalziya šipanti

§ 71

189 -- GIŠBANŠUR=ma=kan kuedani TU7 BA.BA.ZA kitari

190 -- nu=za LÚAZU 1 MUŠEN.GAL dāi

191 -- n=an=kan ANA DEN.ZU ḫurniššiya šipanti

§ 72

192 -- nu=za? GIŠKANNUM-it kuiš DUG-iš šiḫilliyaš witenit šuwanza artari

193 -- nu=kan LÚAZU apēz šer arḫa lāḫui

194 -- nu DUGGAL.GIR4 šunnai

195 -- n=ašta ANA DUG šiḫelliyaš wātar kuit anda nu=za apēz ārri

196 -- DUGGAL=ma kuiš šuwanza n=at ANA waššiḪI.A dāi

197 -- nu waššiḪI.A kuškušanzi

198 -- n=aš=kan ANA DEN.ZU menaḫḫanda tiēzzi

199 -- n=at adanza ekuzi

§ 73

200 -- nu šiḫelliyaš wātar maḫḫan INA UD-MI MAḪRÎ daškizzi

201 -- n=at INA UD 7KAM=ia QĀTAMMA daškizzi

202 -- SÍSKUR maḫḫan INA UDKAM MAḪRÎ iššai

203 -- n=at UD 7KAM QĀTAMMA iššai

204 -- waššiḪI.A=ma maḫḫan INA UD-MI MAḪRÎ ekuzi

205 -- n=at INA UD 7KAM QĀTAMMA=pat akkuškizzi

§ 74

206 -- IŠTU MUŠEN=ia INA UD 7KAM QĀTAMMA waḫnuškizzi

§ 75

207 -- INA UD 7KAM=ma 2 SILA4 dāi

208 -- n=ašta 1 SILA4 ANA DU itkalziya šipanti

209 -- MUŠEN=ma UL dāi

210 -- 1 SILA4=ma=kan ANA DUTU ḫurniššiya šipanti

211 -- MUŠEN=ma UL dāi

§ 76

212 -- nu=za LÚAZU 1 NINDA.SIG dāi

213 -- šer=aš=šan gangātiSAR dāi

214 -- 1 GÍN KÙ.BABBAR=ia dāi

215 -- n=ašta ANA DUGDÍLIM.GAL SIG wātar lāḫui

216 -- n=ašta 1 GÍN KÙ.BABBAR anda peššiyazzi

§ 77

217 -- nu=za LÚAZU NINDA.SIG gangāti=a dāi

218 -- nu=tta DINGIRMEŠ šāndaš menaḫḫanda gangadāizzi

219 -- nu=kan ANA EN.SÍSKUR KÙ.BABBAR iššī anda dāi

220 -- nu LÚAZU kiššan tezzi

221 -- KÙ.BABBAR-aš!?=wa=z iwar PĀNI DINGIRMEŠ DINGIR.LÚMEŠ DINGIRMEŠ MUNUSMEŠ parkuiš ēš

§ 78

222 -- DUB 1KAM QATI AWĀT mAmmiḫatna

223 -- mān UN-aš šuppiš

224 -- nu=šši marša kuiški kuitki pāi

225 -- nu kī SÍSKUR šipandaḫḫi